«Xalıq baxtiniń erkin gúresshisi»

Qaraqalpaqstan Respublikası Málimleme kitapxana orayında 2023 jıl 27-yanvar kúni «Xalıq baxtiniń erkin gúresshisi» atamasında Ózbekstan xalıq jazıwshısı G'afur Ǵulаm tuwılǵanınıń 120 jıllıǵına baǵıshlanıp keshe bolıp ótti.

Keshege Qaraqalpaqstan Respublikası I. Yusupov atındaǵı dóretiwshilik mektebiniń mádeniy máseleler boyınsha ùgit-násiyatlawshısı Miywagúl Baymuratova, tárbiyashı pedagoglar Amangúl Masharipova, Aydawlet Maxsetova hám dóretiwshilik mektebi oqıwshıları, Qaraqalpaqstan Respublikası Málimleme kitapxana orayı Elektron resurslardan paydalanıw hám oqıw zalları xızmet baslıǵı Jibek Tleubaeva, oqıw zalı sektor baslıǵı Bolǵanay Uteniyazovalar qatnastı.

 Kesheni B. Uteniyazova ashtı hám alıp bardı. Ol óz sózinde G'afur Ǵulаm-Ózbekstannıń belgili jazıwshısı, onıń poeziyasında ózbek xalqı, tariyxı óziniń kórkem tımsalın tapqanlıǵı haqqında aytıp ótip, I. Yusupov atındaǵı dóretiwshilik mektebi oqıwshısı X.Shamshetdinova ómiri hám dóretiwshiligi menen tanıstırdı.

M. Baymuratova, jaslardı tariyxımızǵa hám milliy mádeniyatqa qızıǵıwshılıǵın qáliplestiriw hám kúsheytiw, kitapqumarlıq mádeniyatın asırıw, házirgi kúnde jaslarǵa berilip atırǵan múmkinshilikler, jaslarımızdı  hár tárepleme bilimli, ilimli bolıwı hám jaslar keleshegimiz qurıwshısı ekenligi, A. Masharipova Ózbekstan xalıq jazıwshısı G'afur Ǵulаm ózbek hám tájik eski ádebiyatın oqıǵan, rus tilin jaqsı bilgen, ózi de qosıqlar dóretkenligi haqqında aytıp ótti.

Kesheni dóretiwshilik mektebi oqıwshıları  kórkem oqıwlar, saxna kórinisleri menen dawam etip, keshe mazmunli hám qızıqlı juwmaqlandı.