No icon

«Тил миллий бирлигимиз белгиси» атамасында әдебий кеше

2019 жыл 26 - ноябрь күни Қарақалпақстан Республикасы Мәлимлеме-китапхана орайында Қарақалпақстан Республикасы Жоқарғы Кеңеси Президиумының Қарақалпақстан Республикасының «Мәмлекетлик тил ҳаққында»ғы Нызамның қабыл етилгениниң 30 жыллығын кеңнен белгилеў ҳаққындағы қарарына тийкарланып «Тил миллий бирлигимиз белгиси»  атамасында әдебий кеше болып өтти.

    Кешеге  Әжинияз атындағы Нөкис мәмлекетлик педагогикалық институты жанындағы халық билимлендириў хызметкерлерин қайта таярлаў ҳәм олардың қәнигелигин арттырыў аймақлық орайы филология илимлериниң кандидаты, доцент Камал Палымбетов,  Қарақалпақстан Республикасы халық билимлендириў хызметкерлерин қайта таярлаў ҳәм олардың қәнигелигин арттырыў аймақлық орайы китапханасы баслығы Турдыбай Оразов ҳәм  Қарақалпақ мәмлекетлик университети Мәлимлеме-ресурс орайы қәнигеси Раушан Қалмурзаева басшылығындағы «Китапқумарлар» клубы ағзалары қатнасты.

    Кешени Қарақалпақ мәмлекетлик университети студентлери Айнура Жийенбаева ҳәм Байрам Худайбергеновлар алып барды.

  Кешеде  филология илимлериниң кандидаты, доцент К. Палымбетов сөзге шығып, ҳәр бир халықтың өзлигин көрсетиўде, жәмийеттиң раўажланыўында тилдиң орны оғада  әҳмийетли болып, тил халықтың тарийхын, мәдений мийрасын, үрп-әдет ҳәм дәстүрлерин өзинде жәмлеген бийбаҳа байлық екенлиги, Т. Оразов мәмлекетлик тилди раўажландырыўға, оны еле де байытыўға ҳәм сап ҳалында келешек әўладларға жеткериўге айрықша итибар қаратылып, бул бағдарда сөзликлер, сабақлықлар менен оқыў қолланбалары баспадан шығарылып атырғанлығы ҳаққында кең түрде айтып өтти.

   Кеше даўамында К. Палымбетов ҳәм Т. Оразовлар өз авторлығында Қарақалпақ тилине тил бийлиги берилген күнине 30-жыл толыў мүнасибети менен жазылған «Qaralpaqstan» баспасы тәрепинен шыққан «Тил байлығы елде…» атамасындағы методикалық қолланбасын Мәлимлеме-китапхана орайына саўға етти.

  Кешеде «Китапқумарлар» клубы ағзалары өзлериниң таярлап келген тил ҳаққындағы қосық қатарлары ҳәм сахналық көринислери менен шығып,  қатнасыўшыларда үлкен тәсир қалдырды.

   Кешеге арнап улыўма оқўшылар залында шөлкемлестирилген «Тил халықтың руўхы» атамасындағы китап көргизбеси менен   үлкетаныў мағлыўматлар секторы баслығы А. Халмуратова таныстырды.

   Кеше соңында үлкетаныў мағлыўматлар секторы қәнигеси З. Есимова Қарақалпақ тилине тил бийлиги берилген күнине 30-жыл толыў мүнасибети менен бәрше қатнасыўшыларды қутлықлап, келген мийманларға өз  минатдаршылығын билдирди.

Комментарий жазыўшы:

Комментарий (0)