No icon

«Málimleme-kitapxana ag‘lası» kókirek belgisin tapsırıw máresimi bolıp ótti.

2021-jıl 19 - 21 may aralıg‘ında  Tashkent qalası Jaslar sarayında bolıp ótken  «Central Asia – 2021: Ilim, bilimlendiriw, mádeniyat hám bizneste Internet hám málimleme-kitapxana resursları»  XIV Xalıqaralıq konferensiyası sheńberinde Ózbekstan Kitapxanashılıq tarawında eń birinshi márte málimleme-kitapxana tarawınıń rawajlanıwına óz úlesin qosqan, xalıqqa  málimleme-kitapxana xızmetlerin kórsetiwdiń jańa dizimin engiziwde, kitapxanalarda saqlanıp atırg‘an  milliy-mádeniy miyrastı saqlaw hám bayıtıw jumıslarına múnásip úles qosqan,  jámiyetimizde kitap oqıw mádeniyatın, kitapqumarlıqtı keńnen úgit-násiyatlaw hám jas qánigelerdi tayarlawdag‘ı pidákerlik miyneti jáne bul bag‘darda joqarı nátiyjelerge erisken taraw qánigeleri  «Málimleme-kitapxana ag‘lası» kókirek belgisi menen sıylıqlandı. Tashkent qalasındag‘ı «Málimleme-kitapxana ag‘lası» kókirek belgisin tapsırıw máresiminde Qaraqalpaqstan Respublikası Málimleme kitapxana orayı direktorı Injigul Sharapovanıń bolıwı jámáátimiz ag‘zaların úlken quwanıshqa bóledi.

2021-jıl 24-may kúni Qaraqalpaqstan Respublikası Málimleme kitapxana orayında «Málimleme-kitapxana ag‘lası» kókirek nıshanı tapsırıw máresimi bolıp ótti.

Ilajdı Qaraqalpaqstan Respublikası Málimleme kitapxana orayı direktorı I.Sharapova ashtı, óz sózinde Ózbekstan Respublikası Prezidentiniń 2019-jıl 7-iyundegi «Ózbekstan Respublikası xalqına  Málimleme-kitapxana xızmetin kórsetiwdi bunnan bılay da jetilistiriw haqqında»g‘ı qararı tiykarında Ózbekstan Respublikası Ministrler Kabinetiniń 2020-jıl 22-dekabrdegi qararı menen «Málimleme-kitapxana ag‘lası» kókirek belgisi shólkemlestirilgenligin atap ótti. Ilaj dawamında Qaraqalpaqstan málimleme hám g‘alaba kommunikaciyalar basqarması baslıg‘ı A. Bekmuratov,  Qaraqalpaqstan Respublikası Málimleme kitapxana orayı direktor orınbasarı Z. Saparovalar shıg‘ıp,  «Málimleme-kitapxana ag‘lası» kókirek belgisi menen sıylıqlang‘an kásipleslerimizdi qutlıqladı.

Ilajda Qaraqalpaqstan málimleme hám g‘alaba kommunikaciyalar basqarmasınıń baslıg‘ı Azamat Bekmuratov - Nókis rayonı málimleme-kitapxana orayınıń direktorı Lizaxan Nurımbetova, Moynaq rayonı málimleme-kitapxana orayınıń direktorı Aqteńge Embergenova, Taqıyatas rayonı málimleme-kitapxana orayınıń direktorı Nesibeli Sultanova, Berdaq atındag‘ı Qaraqalpaq mámleketlik universiteti málimleme-resurs orayınıń bas kitapxanashısı Rawshan Qalmurzaeva, Qaraqalpaqstan Respublikası kózi ázziler kitapxanasınıń bólim baslıg‘ı Elmira Utambetovalarg‘a «Málimleme-kitapxana ag‘lası» kókirek belgilerin tapsırdı.

Óz gezeginde «Málimleme-kitapxana ag‘lası» kókirek belgileri menen sıylıqlang‘an kásipleslerimizge bul  úlken tabıslarına densawlıqlarıńız bekkem, mártebeńiz bálent, jámiyetimizde kitap oqıw mádeniyatın, kitapqumarlıqtı keńnen úgit-násiyatlaw hám jas qánigelerdi tayarlawdag‘ı jumıslarıńızg‘a tabıslar tilep qalamız!

 

Комментарий жазыўшы:

Комментарий (0)