«Kegeyli» kitabın tanıstırıw máresimi

2023 jıl 22 sentyabr kúni Qaraqalpaqstan Respublikası málimleme kitapxana orayı zalında Qaraqalpaqstan xalıq jazıwshısı, kino scenarist, dramaturg  Muratbay Nızanov hámde elimizge belgili jurnalist Perdegul Xojamuratovalar tárepinen tayarlanıp, baspadan shıqqan jańa «Kegeyli» atamasındaǵı kitaptıń tanıstırıw keshesi bolıp ótti.

Keshege Ózbekstan jurnalistler awqamı Qaraqalpaqstan bólimi baslıǵı, Ózbekstanǵa miyneti sińgen jurnalist Kenesbay Reymov, Ózbekstan jazıwshılar hám jurnalistler awqamı aǵzası, Qaraqalpaqstanǵa miyneti sińgen jurnalist Perdegul Xojamuratova, «Qaraqalpaqstan jasları» gazetası jurnalisti Zbira Abdiniyazova, Ájiniyaz atındaǵı Nókis mámleketlik pedagogikalıq institutı fizika-matematika fakulteti tyuterleri hámde student jasları qatnastı.

Keshe miymanları óz sózlerinde kitaptı Kegeyli rayonınıń dúzilgenine 95 jıl tolıw múnásibeti menen shıǵarılǵanı, kitapta rayonnıń qay jıllarda shólkemlestirilgenligi, ne ushın rayon ataması Kegeyli dep atalǵanı haqqında maǵlıwmatlar bar ekenligi, Kegeyli rayonınan elimizge belgili palwanlar, ilim ǵayratkerleri, shayırlar, jazıwshılar  jetilisip shıqqanlıǵı, rayonnıń jetiskenlikleri tuwralı arxiv materiallarınan paydalanǵan halda kóp insanlardı eske túsiriwler orın alǵanlıǵın aytıp berdi.

Keshe juwmaǵında qatnasıwshılar ózlerin qızıqtırǵan sorawların berip juwaplar alıp,  usınıs pikirlerin berdi.