Kitap avtorınan kitaplar sawǵa etildi

Qaraqalpaqstan Respublikası Málimleme kitapxana orayına 2024-jıl 13-iyun  kúni  Qaraqalpaqstan xabar agentliginiń jetekshi sholıwshısı Adilbay Orazov óziniń  «Qaraqalpaqstan baspasóziniń pidáyıları», «Uyqıdaǵı qız»,  «Watan ushın ot keshken qaharmanlar»  atamasındaǵı kitaplarınan jámi 7 dana sawǵa sıpatında tapsırdı. «Qaraqalpaqstan baspasóziniń pidáyıları» atlı kitabında respublikamız baspasóziniń kósh baslawshıları bolǵan  «Erkin Qaraqalpaqstan»  hám «Vesti Karakalpakstana»  gazetalarında jumıs islegen 100 den aslam baspasóz pidáyısınıń  ómiri hám dóretiwshiligi menen jaqınnan tanısıw  múmkin. Gazetalarda pidáyılıq penen xızmet etken jurnalistler menen fotoxabarshılardıń islegen dóretiwshilik miynetleri ayrıqsha orın tutadı. Bul miynet jurnalistika hám tariyx fakulteti studentleri, ilimiy izleniwshileri ushın hám de  kitap oqıwshılar qáwimi  ushın salmaqlı miynet boladı degen niyettemiz. «Watan ushın ot keshken qaharmanlar»  atlı kitaptaǵı waqıyalar Ekinshi jer júzilik urısta kóp milletli Qaraqalpaqstan xalqınıń fashizm ústinen jeńiske qosqan úlesi, Watan ushın, tınıshlıq ushın janınan keshken qaharman insanlar, sheyit ketken azamatlar, olardıń islegen erlikleri haqqında sóz etiledi. «Uyqıdaǵı qız»  atlı kitapta ashıqlıq, muhabbat, jaslıq, tuwǵan jer temalarındaǵı qosıqları orın alǵan. Kitaptaǵı hár bir qosıq insanǵa qaytalanbas jaslıq dáwirlerin esletedi.Kitaplar kitap oqıwshılar qáwiminiń kewlinen shıǵadı degen niyettemiz.Insan rawajlanıwı hám biliminiń deregi kitap penen baylanıslı. Kitap insandı kámillikke jeteleydi. Sonday eken, bilim hám rawajlanıw mákanı bolǵan kitapxanaǵa qosqan úlesi ushın kitap avtorina Qaraqalpaqstan Respublikası Málimleme kitapxana orayı jámááti hám kóp sanlı kitap oqıwshıları atınan óz minnetdarshılıǵımızdı bildiremiz.