“Amir Temur babamızǵa múnásip áwlad bolayıq” atamasındaǵı ádebiy keshe haqqında

 2025 jıl 11-aprel kúni Qaraqalpaqstan Respublikası málimleme kitapxana orayı zalında ullı sárkarda saqıpqıran Amir Temur tuwılǵanınıń 689 jıllıǵı múnásibeti menen “Biz kim, Múlki Turan” súreni astında “Amir Temur babamızǵa múnásip áwlad bolayıq” atamasında ádebiy keshe bolıp ótti. Keshege Berdaq atındaǵı Qaraqalpaq mámleketlik universiteti tariyx fakulteti, Ózbekstan hám Qaraqalpaqstan tariyxı kafedrası assistenti R.Ilauatdinov, fakultet tyuterlari G. Esboganova, B. Esemuratova hám fakultet studentleri, Ózbekstan Respublikası Ishki isler ministrligi Qaraqalpaq akademikalıq liceyi oqıtıwshıları B.Ibragimova, R. Qarlıbaeva hám licey oqıwshıları, málimleme kitapxana orayı qániygeleri J. Tleubaeva, B. Uteniyazovalar qatnastı. Kesheni B. Uteniyazova ashtı hám alıp bardı. Ol óz sózinde saqıpqıran Amir Temur hám Temriylerdıń ilim, arxitektura, muzıka, medicina, ádebiyat hám basqa tarawlarda ámelge asırǵan jumısları haqqında maǵlıwmat berdi. R. Ilauatdinov Amir Temur -dúnya tariyxında  úlken iz qaldıra alǵan ullı sárkarda, Orta ásirlerdiń eń ataqlı ásker basshısı, úlken imperiya tiykarshısı ekenligi haqqında aytıp ótti. Sonday-aq, B. Ibragimova óz sózinde sahıpqıran Amir Temurdı watanımız gúlleniwine qosqan úlesi, ózbek xalqı perzentleride óz tariyxın asırawı jáne onı kelesi áwladlarǵa jetkiziwi, ullı babamız úgitleri hám hikmetleri, dóretpeleri mánisin salıstırıp túsindirip berdi. Qatnasıwshılardı “Xalıq danıshpanınıń tımsalı hám mártlik tımsalı” atamasında kitaplar kórgizbesi menen tanıstırıldı. Keshe sońında qatnasıwshılar ózlerin qızıqtırǵan sorawlarına juwaplar aldı.